قلفیاں فروخت کرنیوالے غریب محنت کش کی بیٹی کا بڑا اعزاز، میٹرک میں نمایاں پوزیشن حاصل کر لی

سوہاوہ: قلفیاں فروخت کرنیوالے غریب محنت کش کی بیٹی کا بڑا اعزاز، طالبہ نے گورنمنٹ گرلز ہائی سکول بڑاگواہ سے 996 نمبر حاصل کر کے دوسری پوزیشن جبکہ نجی کالج میں کوئز مقابلہ میں پہلی پوزیشن حاصل کر لی۔

تفصیلات کے مطابق گزشتہ روز میٹرک کے سالانہ رزلٹ کاراولپنڈی بورڈ نے اعلان کیا۔ گورنمنٹ گرلز ہائی سکول بڑاگواہ کی طالبہ جس کا والد قلفیاں فروخت کرتا ہے اس کی بیٹی ثناء قاسم نے 996 نمبر حاصل کرکے سکول سے دوسری پوزیشن حاصل کرلی۔

اس کے علاوہ کچھ دن قبل ثناء قاسم نے نجی کالج میں کوئز مقابلہ میں پہلی پوزیشن حاصل کرکے لیپ ٹاپ اور فرسٹ ایئر کیلئے سو فیصد سکالرشپ حاصل کی تھی اور والدین کا سرفخر سے بلند کیا تھا۔

طالبہ کا کہنا تھا اگر حکومتی سطح پر میری مدد کی جائے تو ضلع کا نام آگے بھی روشن کروں گی۔ یہ سب میرے والدین اور ٹیچرز کی محنت کا نتیجہ ہے۔

ثناء کے والد کا کہنا تھا ٹیچرز کی محنت سے میری بیٹی نے اچھے نمبر حاصل کرکے کامیابی سمیٹی، اگر میرٹ پر پیپر ہوتے تو بیٹی پہلی پوزیشن حاصل کرتی، میں پردیسی ہوں یہاں کچھ عرصہ سے مقیم ہوں اور قلفیاں فروخت کرکے بچوں کا اس مہنگائی میں پیٹ پال رہاہوں۔

نجی کالج کے ڈائریکٹر کا کہناتھاکہ ثناء قاسم نے اچھے نمبر حاصل کئے اور کامیاب ہوئی، اس کے فرسٹ ایئر میں تمام اخراجات دی ویژن کالج اٹھائے گا، مکمل سکالرشپ دے رہے ہیں۔