پنڈدادنخان میں احتجاج اور ریلیاں؛ پٹواری، ہیلتھ ورکرز، تاجر، ٹیچرز اور بلدیہ ملازمین سراپا احتجاج

پنڈدادنخان میں احتجاج اور ریلیاں، ایک دن میں پانچ مظاہرے، پٹواری، ہیلتھ ورکرز، تاجر، سکول ٹیچرز اور میونسپل کمیٹی ملازمین سراپا احتجاج ہیں۔

تفصیلات کے مطابق تحصیل ہیڈ کوارٹر پنڈدادنخان آج احتجاجی مظاہرین کی زد میں رہا۔ تاجر، پٹواری، میونسپل کمیٹی اہلکار، سکول ٹیچرز، اے سی آفس سٹاف اور لیڈی ہیلتھ ورکرز سراپا احتجاج رہے۔

تاجر ورکنگ کمیٹی کی طرف سے للِہ تا جہلم ڈیلول کیرج وے منصوبہ سست روی اور فنڈز کی کمی کے باعث تاخیر کا شکار ہونے پر تاجروں نے احتجاجی ریلی نکالی۔

سکول ٹیچرز نے تنخواہوں میں کٹوتی کے خلاف اسسٹنٹ کمشنر آفس پنڈدادنخان کے سامنے احتجاجی مظاہرہ کیا، میونسپل کمیٹی اہلکار مطالبات منظور نہ ہونے پر سراپا احتجاج رہے جبکہ محکمہ ریونیو اے سی آفس سٹاف نے دھرنا دیا۔

سول ہسپتال میں تعینات لیڈی ہیلتھ ورکرز کی بڑی تعداد نے کشمیر چوک میں تنخواہوں میں کٹوتی کے خلاف احتجاج کیا جس سے ٹریفک کی روانی متاثر ہوئی۔

تمام مظاہرین اپنا احتجاج ریکارڈ کرانے کے بعد خود ہی پرامن طور پر منتشر ہو گئے۔