پنڈدادنخان: عید قریب آتے ہی گرانفروش متحرک، انتظامیہ غائب، تحصیل پنڈدادنخان میں خود ساختہ مہنگائی کا طوفان، اشیا خوردونوش پھل سبزیوں کی قیمتیں آسمان سے باتیں کرنے لگیں، غریب عوام منافع خوروں کے ہاتھوں لٹنے لگے، متعلقہ حکام خاموش تماشائی ، قصاب بھی من مانے ریٹ پر لاغر جانوروں کا گوشت فروخت کرنے لگے، غریب مہنگائی کی چکی میں پس گئے۔
تفصیلات کے مطابق تحصیل پنڈدادنخان اور بلخصوص ضلع جہلم کے دوسرے بڑے شہر کھیوڑہ میں عید قریب آتے ہی گرانفروشوں نے انت مچا دی، دکاندار پھل سبزیوں اور اشیاء خوردونوش کے من مانے ریٹس وصول کرنے لگے جبکہ دکانوں کے علاوہ سڑک کنارے کھڑے ریڑی با ن جو کہ تجاوزا ت کا موجب بھی ہیں بہتی گنگا میں ہاتھ دھونے لگے۔
دوسری جانب تحصیل بھر میں قصاب چکن ،بیف اور مٹن کے اپنے اپنے ریٹس مقرر کرکے گوشت فروخت کرنے میں مصروف ہیں بڑا گوشت 800سے 850چھوٹا گوشت 1500سے 1600روپے میں فروخت ہونے لگا چکن شاپس پر بھی ہر ایک کا الگ ریٹ ہے۔
ذارئع نے انکشاف کیا ہے کہ تحصیل پنڈدادنخان میں قصاب بیمار مادہ اور لاغر جانوروں کا گوشت بھی فروغ کررہے ہیں اور فوڈ انسپکٹر سمیت وٹنری کا عملہ دفتروں تک محدود رہتا ہے جبکہ انتظامیہ فری آٹے کی تقسیم تک محدود ہونے کے باعث گرانفرو ش دونوں ہاتھوں سے غریب عوام کو لوٹنے میں مصروف ہیں، ہر ایک نے اپنی من مرضی کے ریٹ وصول کر رہا ہے جبکہ غریب عوام مہنگائی کی چکی میں پسے جا رہے ہیں۔
شہریوں نے کمشنر راولپنڈی اور ڈی سی جہلم سے استدعا کی ہے کہ چیک اینڈ بیلنس کے موثر اقدامات کئے جائیں اور انتظامیہ کو متحرک کرنے کے موثر اقدامات کیے جائیں تاکہ گرانفروشوں کے خلاف کارروائی عمل میں لائی جائے۔