جہلم: صحافت کی بے توقیری ہرگز برداشت نہیں، ذمہ دار صحافیوں کا فرض ہے کہ وہ صحافت کی آڑ میں چھپی کالی بھیڑوں کو بے نقاب کرنے کے ساتھ ساتھ ان کا محاسبہ کریں اور مل جل کر ایسے عطائی صحافیوں کا راستہ روکیں تا کہ صحافت کی حرمت کو بچایا جا سکے۔
ان خیالات کا اظہار جہلم پریس کلب کے چیئرمین ڈاکٹر سہیل امتیاز خان اور صدر الیکٹرانک میڈیا چوہدری عابد محمود نے تحصیل سرائے عالمگیر سے آئے ہوئے صحافیوں کے وفد سے خصوصی گفتگو کرتے ہوئے کیا۔ انہوں نے کہا کہ صحافت ایک مقدس پیشہ ہے، لہذا صحافیوں کا فرض ہے کہ وہ اپنے قلم کے ذریعے ظلم و جبر اور معاشرتی نا انصافیوں کے خلاف جہاد کریں تا کہ مظلوم کی دادرسی اور ظالم کا راستہ روکا جاسکے، جہلم پریس کلب اس سلسلہ میں اپنا بھر پور کردار ادا کر رہا ہے۔
انہوں نے مزید کہا کہ جہلم پریس کلب شہریوں کی آواز ارباب اختیار تک پہنچانے میں اہم کردار ادا کر رہا ہے، چیئرمین جہلم پریس کلب ڈاکٹر سہیل امتیاز خان نے کہا کہ علاقہ مکینوں کے مسائل کو اجاگر کرنا ضلع جہلم کے صحافی اپنا فرض سمجھتے ہیں۔
اس موقع پر چوہدری عابد محمود نے کہا کہ صحافت کی بے توقیری ہرگز برداشت نہیں ہونے دیا جائے گا، ذمہ دار صحافیوں کا فرض ہے کہ وہ صحافت کی آڑ میں چھپی کالی بھیڑوں کو بے نقاب کرنے کے ساتھ ساتھ عطائی صحافیوں کا محاسبہ کریں۔
اس موقع پر عامر کیانی، چوہدری دانیال عابد، عکراش کامران، عبدالغفار آذاد، چوہدری مہربان حسین، سید ناصر حسین شاہ، چوہدری تصور حسین، چوہدری عامر غفور سمیت دیگر بھی موجود تھے۔