سردی کی لہر کے ساتھ ہی خشک میوہ جات اور ڈرائی فروٹ کی قیمتوں میں کئی گنا اضافہ ہو گیا

جہلم: سردی کی لہر کے ساتھ ہی خشک میوہ جات اور ڈرائی فروٹ کی قیمتوں میں کئی گنا اضافہ ہو گیا، دیسی میوہ 700 سے بڑھ کر 1200 روپے، افغانی میوہ 1600 روپے میں فروخت ہونے لگا ، ایرانی بادام 2800 روپے، افغانی با دام 3200 جبکہ امریکن بادام 2400 روپے کلو کی بلند سطح پر فروخت کیا جا رہا ہے ۔

سروے کے دوران معلوم ہوا کہ پنجاب حکومت اور ضلعی انتظامیہ کی جانب سے ڈرائی فروٹس کا کوئی واضح نرخ نامہ مرتب نہیں کیا گیا۔ سروے کے مطابق گذشتہ سال 1600 روپے میں فروخت ہونے والے صاف چھلا ہوا اخروٹ اس وقت 2400 روپے میں فروخت ہورہا ہے۔

اسی طرح خشک خوبانی کی قیمت بھی 900 سوروپے سے بڑھ کر 1400 روپے ہوگئی ہے، چلغوز ہ ثابت 8800 ، چھلا ہوا12000 روپے میں فروخت ہورہا ہے۔ براؤن انجیر 2000 روپے سے بڑھ کر 2800، سفید انجیر 2500 روپے سے بڑھ کر 3600 روپے تک فروخت کی جارہی ہے سادہ کا جو 2000 سے بڑھ کر2800 روپے جبکہ فرائی کا جو 2400 روپے سے بڑھا کر 3200 روپے میں فروخت کیا جارہا ہے سندر خانونی میوہ جات بھی 1000 سے بڑھا کر 1600 روپے میں فروخت کیا جارہا ہے۔

دوسری جانب ڈرائی فروٹ فروخت کرنے والے دکانداروں کا کہنا ہے اس مرتبہ بروقت مال کی سپلائی نہ ہونے کے باعث کافی خسارے کا سامنا ہے جس خسارے کو عوام سے ہی پورا کرنا ہوتا ہے حکومت ڈرائی فروٹ کے مال کی سپلائی کو بروقت یقینی بنائے اور اس میں مشکلات کو ختم کرکے آسانیاں پیدا کرے تو ہم بھی ڈرائی فروٹ کی قیمتوں میں کمی کر دیں گے۔