جہلم: ضلع جہلم میں رواں سال کی چوتھی پولیو مہم کا آغاز 21 نومبر سے شروع ہو رہا ہے جو 25 نومبر تک جاری رہے گی، اس دوران ضلع بھر میں پانچ سال تک کی عمر کے 2 لاکھ 17 ہزار سے زائد بچوں کو گھر گھر جا کر پولیو سے بچاؤ کے قطرے پلائے جائیں گے۔
اس سلسلے میں انتظامات کا جائزہ اجلاس ڈپٹی کمشنر جہلم نعمان حفیظ کی زیرصدرات منعقد ہوا جس میں چیف ایگزیکٹو آفیسر ڈاکٹر میاں مظہر حیات، انفارمیشن، ایجوکیشن اور دیگر محکموں کے سربراہان نے شرکت کی۔
چیف ایگزیکٹو آفیسر ہیلتھ میاں ڈاکٹر مظہر حیات نے بریفننگ دیتے ہوئے بتایا کہ 21 نومبر سے شروع ہونے والی پولیو مہم کے حوالے سے تمام تر انتظامات مکمل کر لیے گئے ہیں، پولیو ٹیموں کی ٹریننگ مکمل ہو چکی ہے۔
انہوں نے بتایا کہ ضلع جہلم کی 56 یونین کونسلز میں 2 لاکھ 17 ہزار سے زائد بچوں کو انسداد پولیو کے قطرے پلائے جائیں گے، رواں مہم میں 1094 موبائل ٹیمز، 74 فکسڈ ٹیمز اور 24 ٹرانزٹ ٹیمز حصہ لیں گی۔
ڈپٹی کمشنر نعمان حفیظ نے کہا کہ پولیو مہم کو کامیاب بنانے کے لیے تمام وسائل بروئے کار لائے جارہے ہیں، انہوں نے والدین سے اپیل کی کہ اپنے پانچ سے کم عمر کے بچوں کو پولیو سے بچاؤ کے قطرے ضرور پلائیں تاکہ بچوں کو زندگی بھر کی معذوری سے بچایا جا سکے۔