جہلم: ضلع کچہری تا منڈی موڑ ، وائے کراس تا بلال ٹاؤن، پوسٹ گریجویٹ کالج ٹاہلیانوالہ روڈ ، محمدی چوک تا کمیلا روڈ پر نصب ہونے والی سٹریٹ لائٹس شہریوں کو روشنیاں فراہم کرنے سے قاصر، میونسپل کمیٹی نے سفید ہاتھی کا روپ دھار لیا، قومی خزانے کو سالانہ لاکھوں کروڑوں کی پھکی، شہریوں کا چیئرمین نیب، ڈی جی اینٹی کرپشن سے تحقیقات کروانے کا مطالبہ۔
تفصیلات کے مطابق میونسپل کمیٹی کی انتظامیہ نے محض چند ماہ قبل ضلع کچہری تا منڈی موڑ ، وائے کراس تا بلال ٹاؤن، پوسٹ گریجویٹ کالج ٹاہلیانوالہ روڈ ، محمدی چوک تا کمیلا روڈ پر نئی اور پرانی سڑیٹ لائٹس کی تنصیب اور مرمت کیں جو چند روز بعد ہی دوبارہ ناکارہ ہو چکی ہیں۔
سڑکوں پر نصب ہونے والی سٹریٹ لائٹس کے لاکھوں کروڑوں روپے قومی خزانے سے نکلوائے گئے۔ناقص و غیر معیاری سٹریٹ لائٹس جو کہ محض 3 ماہ قبل نصب اور مرمت کی گئی تھیں، ناکارہ ہونے کے باعث چند روز کے اندر اندر ہی اپنی افادیت کھو چکی ہیں جس کیوجہ سے کچہری وائے کراس تا بلال ٹاؤن، پوسٹ گریجویٹ کالج ٹاہلیانوالہ روڈ ، سول لائن روڈ سمیت میجر اکرم شہید روڈ پر ایک بار پھر گھپ اندھیرہ چھا چکا ہے۔
قابل ذکر بات یہ ہے کہ سٹریٹ لائٹس نصب ومرمت کرنے والے ذمہ داران نے ڈنگ ٹپاؤ مال بناؤ پالیسی پر عملدرآمد کرتے ہوئے ہر پول پرلائٹس نصب کرنے کی بجائے متعدد مقامات پر 2 سے 3 پول چھوڑ کر لائٹس نصب کیں جس سے قومی خزانے کو مالی نقصان پہنچایا گیا ہے۔
شہریوں نے چیئرمین نیب، ڈائریکٹر جنرل اینٹی کرپشن سے مطالبہ کیا ہے کہ میونسپل کمیٹی میں سٹریٹ لائٹس کے نام پر کرپشن کی تحقیقات کروائی جائیں اور مالی بدعنوانی میں ملوث افسران و اہلکاروں کو منظر عام پر لانے کے ساتھ ساتھ فوجدار ی مقدمات درج کروائے جائیں تاکہ سرکاری اداروں میں ہونے والی مالی بے ضابطگیوں کا خاتمہ ممکن ہو سکے۔