جہلم: شہر کے ہوٹل مالکان نے خانہ بدوشوں سے کئی من قربانی کا گوشت سستے داموں خرید کر فریز کر لیا،ہوٹل کھلنے کے بعد گاہکوں کو من مرضی کے نرخوں پر فریز شدہ گوشت کھلایا جائے گا۔
ایک ہوٹل کے ملازم نے نام نہ ظاہر کرنے کی شرط پر بتایا کہ عید قربان پر گھر گھر جا کر قربانی کا گوشت جمع کرنے والے خانہ بدوشوں سے بااثر ہوٹلز مالکان نے کئی من گوشت اونے پونے داموں خرید لیا ہے، ہوٹل مالکان بڑا گوشت 200 روپے کلو اور چھوٹا گوشت 400 روپے کلو ، اس طرح بااثر ہوٹلز مالکان نے منوں کے حساب سے چھوٹا اور بڑا گوشت خریدکر فریز کرلیا ہے۔
ہوٹل ملازم نے بتایا کہ عید کی چھٹیاں ختم ہونے کے بعد ہوٹل کھلتے ہی خانہ بدوشوں سے سستے داموں خریدا گیا گوشت ہوٹل مینو میں شامل کر دیا جائیگااور فریز کیا گیا، گوشت قریباً ایک ماہ تک چٹ پٹے مصالحے لگا کر مہنگے داموں فروخت کیا جائے گا۔