جہلم: شہر سمیت ضلع بھر میں کم وزن روٹی و نان کی زائد قیمت پرفروخت جاری، ضلعی انتظامیہ اور پرائس کنٹرول مجسٹریٹس نے شہریوں کو ناجائز منافع خور تندور و ہوٹل مالکان کے رحم و کرم پر چھوڑ دیا۔شہریوں نے دہائیاں دیتے ہوئے وزیر اعلیٰ پنجاب ، چیف سیکرٹری پنجاب سے نوٹس لے کر انتظامیہ اور گراں فروش نان بائیوں کے خلاف کارروائیاں کرنے کا مطالبہ کر دیا۔
تفصیلات کے مطابق روٹی اور نان کے مقررہ وزن 100گرام کی بجائے 70 سے 80 گرام اور روٹی کی قیمت 8 روپے کی بجائے 15 روپے، اسی طرح نان کی قیمت 12 روپے کی بجائے 15 روپے میں فروخت کی جا رہی ہیں، ضلعی انتظامیہ اور پرائس کنٹرول مجسٹریٹس بااثر تندور و ہوٹل مالکان کے سامنے ریت کی دیوار ثابت ہو رہے ہیں۔
شہریوں کا اس حوالے سے کہنا ہے کہ انتظامیہ نے سوچی سمجھی سازش کے تحت صارفین کو ناجائز منافع خور تندور و ہوٹل مالکان کے رحم و کرم پر چھوڑ رکھا ہے۔ ایک طرف سوئی گیس کی لوڈشیڈنگ اور بندش کا سلسلہ جاری ہے اور غریب عوام جب اپنا اور اپنے بچوں کا پیٹ بھرنے کیلئے نان و روٹی خریدنے کیلئے تندوروں کا رخ کرتے ہیں تو تندور و ہوٹل مالکان دونوں ہاتھوں سے صارفین کو لوٹنے میں مصروف عمل ہیں۔
شہریوں نے وزیر اعلیٰ پنجاب حمزہ شہباز ، چیف سیکرٹری پنجاب سے مطالبہ کیاہے کہ گراں فروشی کے مرتکب نان بائیوں اور انکی سرپرستی کرنے والے افسران کے خلاف قانونی کارروائی عمل میں لائی جائے اور فرض شناس ایماندار افسران کو تعینات کیاجائے تاکہ سفید پوش طبقہ سے تعلق رکھنے والے شہری حکومت کے مقررہ کردہ نرخوں پر روٹی و نان خرید کا اپنے بیوی بچوں کا پیٹ پال سکیں۔