جہلم: محکمہ بہبود آبادی جہلم کی ڈسٹرکٹ ٹیکنیکل کمیٹی کا ماہانہ اجلاس ڈاکٹر میاں مظہر حیات چیف ایگزیکٹو آفیسر ہیلتھ کی زیر صدارت منعقد ہوا۔
بابر ظہیر ضلعی آفیسر محکمہ بہبود آبادی جہلم نے شرکاء کو محکمہ بہبود آبادی کی ماہانہ کارکردگی کا جائزہ پیش کیا جس میں محکمہ بہبود آبادی کی جانب سے فراہم کی گئی خدمات، مانع حمل ادویات اور ماں بچے کی صحت اور خاندانی منصوبہ بندی بارے آگاہی مہم شامل ہیں۔
بابر ظہیر نے شرکاء کو بتایا کہ عالمی یوم آبادی ہر سال 11 جولائی کو منایا جاتا ہے لیکن اس سال عید الاضحیٰ کی چھٹیوں کے پیشِ نظر عالمی یوم آبادی کی تقریبات کو ہفتہ آبادی (18-22 جولائی 2022) کے طور پر منایا جائیگا اور تمام تقریبات کا بھرپور انعقاد کیا جائے گا تاکہ عوام الناس میں تیزی سے بڑھتی ہوئی آبادی اور اس کے مضمرات بارے آگاہی فراہم کی جاسکے۔
ڈاکٹر میاں مظہر حیات چیف ایگزیکٹو آفیسر محکمہ صحت جہلم نے محکمہ بہبود آبادی اور محکمہ صحت کے مثالی تعاون کو سراہا اور اس بات کا عہد کیا کہ ضلع جہلم میں عوام الناس کی بہتری اور بہتر خدمات کی فراہمی کے لیے محکمہ بہبود آبادی اور محکمہ صحت کے مابین اشتراک اور تعاون کا سلسلہ جاری رہے گا جبکہ ہفتہ آبادی کی تقریبات میں بھی محکمہ صحت بھرپور شرکت اور شراکت کا یقین دلایا۔
اجلاس میں دونوں محکموں کے عملہ کے لئے تربیتی سیشنز اور ان علاقوں میں جہاں صحت اور خاندانی منصوبہ بندی کی سہولیات کے مراکز یا عملہ موجود نہیں ہیں کے مکینوں کو بہتر خدمات اور سہولیات کی فراہمی کے لیے مشترکہ نظام کی فعالیت پر اطمینان کا اظہار کیا۔