جہلم: شہر سمیت مضافاتی علاقوں کی آبادی بڑھنے کے ساتھ ساتھ گندگی میں بھی اضافہ ہونے لگا، شہری غیر ذمہ داری کا مظاہرہ کرتے ہوئے گھروں کی گندگی قریبی خالی پلاٹوں ، نالوں میں پھینکنے لگے ، شہری آبادیوں میں بیماریاں پھیلنے کا خطرہ ہے۔
تفصیلات کے مطابق شہر سمیت ملحقہ آبادیوں میں روز بروز بڑھتی ہوئی آبادی کیوجہ سے شہری غیر ذمہ داری کا مظاہرہ کرتے ہوئے گھروں کی گندگی قریبی خالی پلاٹوں ، نالوں ، گلی محلوں میں پھینکنے لگے جس کی وجہ سے آبادیوں میں گندگی پھیل رہی ہے ، شہریوں کو چاہیے کہ گھروں کی گندگی شہر میں جہاں فلتھ ڈپو قائم ہیں وہاں پھینکیں تاکہ شہری آبادی گندگی سے پاک ہوسکے۔
تنظیموں کے عمائدین نے ضلعی انتظامیہ سے مطالبہ کیا ہے کہ شہر سمیت مضافاتی علاقوں کے گلی محلوں میں فلتھ ڈپو تعمیر کئے جائیں جہاں سے میونسپل کمیٹی کے سینٹری ورکرز روزانہ کی بنیاد پر ان فلتھ ڈپوؤں سے گندگی اٹھانے کے پابند ہوں۔
انہوں نے میونسپل کمیٹی کے چیف آفیسر سے یہ بھی مطالبہ کیا ہے کہ شہر سمیت ملحقہ آبادیوں میں جو خالی پلاٹ موجود ہیں ان کے مالکان کو خالی پلاٹ کو چاروں اطراف سے دیوار بنا کر بند کروانے اور صفائی ستھرائی کروانے کا پابند بنایا جائے ایسا نہ کرنے والے مالکان کے خلاف قانونی کارروائی عمل میں لائی جائے تاکہ شہری آبادی صاف ستھری ہونے کے ساتھ ساتھ شہری بیماریوں سے محفوظ رہ سکیں۔