جہلم: شہر کی معروف سماجی و مذہبی شخصیت سید خلیل حسین کاظمی نے کہا ہے کہ افراتفری کے دور میں حُب رسول ﷺ سے جنت کا راستہ ملتا ہے ، امن ہمیں آمنہ کے لعلﷺ کی برکت سے ملا، امن ہماری وراثت ہے، حْب رسول ﷺ کی مالا میں پروئے ہوئے مسلمان متحد ہو جائیں۔
ان خیالات کا اظہار انہوں نے جہلم پریس کلب میں ٹیلیفونک گفتگو کرتے ہوئے کیا۔ انہوں نے کہا کہ نام محمدؐسے دونوں ہونٹ جڑ تے ہیں ، کلمہ پڑھنے والے کیوں نہیں جڑ جاتے، آمد رسولﷺ کا تقاضہ بھی یہ ہے کہ قوم اپنی صفوں میں انتشار اور نفرت کی بد بو پیدا نہ ہونے دیں،دل کی گلی میں حْب رسول ؐ کا چراغ روشن ہو جائے ، تو نفرت کے اندھیرے ختم ہو جائیں گے۔
انہوں نے کہا کہ ہمارا معاشرہ برائیوں اور اخلاقی کمزوریوں کا شکار ہو چکا ہے ،اس جدید ٹیکنالوجی کے سیاہ دور میں انسان پستی اور تنزلی کی جانب رواں دواں ہے،کتنے افسوس کی بات ہے جن ممالک کا ماضی اور مستقبل تاریک ہے ، وہ دنیا کی قیادت کر رہے ہیں اور جو در رسول ﷺ سے روشنی حاصل کرتے ہیں ، وہ خود تاریکی کا حصہ بنتے جارہے ہیں۔
انہوں نے کہا کہ اخلاقی پستی ،جذباتی انتشار اور فکری خلفشار کے اس سیاہ دور میں ضرورت اس امر کی ہے کہ ملک بھر میں حْب حبیب ﷺ کانفرنسوں کا انعقاد عمل میں لایا جائے کیونکہ حضور کریم ﷺ ہی اس کائنات ارض و سما کی تخلیق کا محرک اور سبب ہیں، مسلمان حْب رسول ؐ کا دامن پکڑ لیں تو دنیا کی کوئی طاقت انہیں شکست نہیں دے سکتی۔