جہلم: حکومت کی جانب سے ایف بی آر ملازمین کو اسپیشل الاؤنس نہ دینے پرملازمین نے قلم چھوڑ ہڑتال کی ، فیڈرل بورڈ آف ریونیو (ایف بی آر) کے ملازمین نے تنخواہوں اور فیول الاؤنس میں اضافے کے مطالبے کو وفاقی حکومت نے منظور نہیں کیا جس کی وجہ سے ایف بی آر کے ملازمین قلم چھوڑ ہڑتال پر مجبور ہو گئے۔
انہوں نے کہا کہ اگر ہمارے مطالبات منظور نہ ہوئے تو قلم چھوڑ ہڑتال غیر معینہ مدت تک جاری رہے گی۔ ایف بی آر کے ملازمین کا اس حوالے سے کہنا ہے کہ چیئرمین ایف بی آر کو تحریر طور پر آگاہ کر دیا تھا۔
ملازمین کے مطابق حالیہ وفاقی بجٹ میں دیگر وفاقی اداروں آئی بی اور ایف آئی اے وغیرہ کے ملازمین کی تنخواہوں میں غیر معمولی اضافہ کر دیا جبکہ مذکورہ وفاقی اداروں کے ملازمین کے مختلف الاونسز میں بھی اضافہ کر دیا گیاہے لیکن ایف بھی آر کے ملازمین ابھی تک تنخواہوں اور الاؤنسز میں اضافے سے محروم ہیں جو کہ ایف بی آر کے ملازمین کے ساتھ امتیازی سلوک کے مترادف ہے۔
ملازمین کی جانب سے کہا گیا کہ حکومت نے بجٹ سے پہلے ایف بی آر کے ملازمین کی تنخواہوں میں اضافے کو ایجنڈے میں شامل کیا تھا لیکن بجٹ کے اعلان کے دوران اضافے کو پس پشت ڈال دیا گیا۔
ملازمین کا کہنا ہے کہ وہ ریونیو جمع کرنے کے لئے انتھک محنت کرتے ہیں اور ٹیکسز جمع کرتے ہیں اور ملک کی معیشت میں ریڑھ کی ہڈی کا کردار ادا کرتے ہیں کیونکہ ملازمین ہر سال سخت محنت کرکے اور آمدن کی صورت ایک بہت بڑی رقم قومی خزانے میں جمع کرواتے ہیں لیکن بد قسمتی سے ایف بی آر کے اپنے ملازمین تنخواہوں اور الاؤنسز میں اضافے سے محروم ہیں۔
ملازمین نے حکومت سے مطالبہ کیا کہ ملازمین کو بنیادی تنخواہ ( فائیو بیسک پے)، سپیشل ریونیو الاؤنس اور گریڈ 17 اور اس زائدکے افسران کو 30 ہزار روپے تک فیول الاؤنسز دیا جائے، بصورت دیگر تمام ملازمین مطالبات منظور ہونے تک احتجاج جاری رکھیں گے۔