جہلم میں جی ٹی روڈ پر گزشتہ روز ہوٹل میں ہونے والے سلنڈر دھماکے کا مقدمہ تھانہ کالا گوجراں میں درج کرلیا گیا، ایف آئی آر میں ہوٹل کے مالک میاں سکندر اور بیٹے قیصر کو نامزد کیا گیا ہے، عمارت میں غیر قانونی گیس ری فلنگ کی جا رہی تھی۔
تفصیلات کے مطابق جہلم کے علاقہ کشمیر کالونی میں واقع ہوٹل راٹھیاں جی ٹی روڈ پر میاں سکندر ہوٹل کی بلڈنگ میں سلنڈر دھماکے کا مقدمہ پولیس کی مدعیت میں مختلف سنگین دفعات کے تحت درج کیا گیا، گیس ری فلنگ کرنے والے دکان کا مالک مقدمے میں نامزد کیا گیا ہے۔ اس کے علاوہ تباہ ہونے والی دو منزلہ عمارت کے مالک کیخلاف بھی مقدمہ درج کیا گیا ہے۔
ایف آئی آر کے متن میں انکشاف کیا گیا ہے کہ عمارت کی بیسمنٹ میں غیر قانونی طور پر گیس کی ری فلنگ کی جا رہی تھی، دھماکا عمارت کے بیسمنٹ میں سلنڈر پھٹنے کے باعث پیش آیا۔
سرکاری طور پر کی گئی تحقیقات سے یہ بات ثابت ہو گئی کہ واقعی دھماکہ ہوٹل کے تہہ خانے میں ہوا جہاں ری فلنگ کے دوران دکاندار کے سگریٹ سلگاتے ہی دھماکہ ہو گیا جس سے تین منزلہ عمارت زمین بوس ہو گئی۔
امدادی کارروائیوں کے دوران ہوٹل کے تہہ خانے سے 22 سلنڈر بر آمد ہوئے ہیں جن میں سے پانچ سلنڈر گیس سے بھرے ہوئے تھے۔اگر وہ سلنڈر بھی پھٹ جاتے تو تہہ خانے سے زندہ بچ جانے والے افراد بھی لقمہ اجل بن جاتے۔
دوسری جانب ایم ایس ڈی ایچ کیو اسپتال ڈاکٹر سرمد نے ایک بیان میں کہا ہے کہ جہلم سلنڈر دھماکے کے10میں سے9زخمیوں کو اسپتال سے ڈسچارج کردیا گیا ہے۔
ایم ایس ڈی ایچ کیو کے مطابق دھماکے کے بعد ملبے سے17افراد کو نکالا گیا تھا، ملبے سے نکالے گئے 17 افراد میں سے7جاں بحق ہوئے تھے۔