جہلم: ڈینگی وائرس سے بچاؤ اور مچھر کی افزائش کو روکنے کیلئے اقدامات کیے جارہے ہیں۔ حسن خالد وڑائچ

جہلم: حکومت پنجاب کی ہدایت پر عالمی دن برائے انسداد ڈینگی کے تحت ڈسٹرکٹ پاپولیشن ویلفیئر آفس جہلم کے زیر اہتمام ضلع جہلم کی تمام تحصیلوں میں انسداد ڈینگی آگاہی مہم جاری ہے۔

حسن خالد وڑائچ ڈسٹرکٹ پاپولیشن ویلفیئر آفیسر جہلم نے میڈیا سے بات کرتے ہوئے کہا کہ سیکرٹری پاپولیشن ویلفیئر ڈیپارٹمنٹ پنجاب کی خصوصی ہدایت پر پنجاب کے دیگر اضلاع کی طرح ضلع جہلم میں ڈینگی وائرس سے بچاؤ اور مچھر کی افزائش کو روکنے کے لیے تمام ضروری اقدامات کیے جا رہے ہیں۔

انہوں نے کہا کہ محکمہ بہبود آبادی جہلم کے تمام دفاتر، فیملی ہیلتھ کلینکس، فلاحی مراکز پر انسداد ڈینگی آگاہی سیمینارز/ آگاہی سیشنز کا انعقاد، صفائی، بارش کے پانی کی نکاسی، نمایاں مقامات پر آگاہی پینا فلیکس آویزاں اور پمفلٹس تقسیم کئے گئے جبکہ ان اقدامات کی الیکٹرانک، پرنٹ اور سوشل میڈیا کے ذریعے تشہیر کی جارہی ہے۔

حسن خالد وڑائچ نے کہا کہ ڈینگی بخار سے بچاؤ کے لیے احتیاطی تدابیر اختیار کرنا ہی اس مہلک مرض کے پھیلاؤ کو روک سکتا ہے اس لئے ضروری ہے کہ ایسے اقدامات کیے جائیں کہ ڈینگی مچھر کی افزائش نہ ہو اس سلسلے میں گھروں، دفاتر اور گردونواح کی صفائی، بارش کے پانی کے نکاس کو یقینی بنانا، پوری آستین کا لباس، گھروں میں رکھے گئے گملوں، برتن اور کاٹھ کباڑ میں پانی جمع نہ ہونے دینا جبکہ مچھر کے کاٹے سے بچنے کیلئے مچھر بھگاؤ لوشن کا استعمال کیا جائے۔

حکومت پنجاب کی ہدایت پر ضلعی انتظامیہ نے اپنے تمام وسائل اس مرض کے پھیلاؤ کو روکنے اور علاج کے لیے وقف کردئیے ہیں کسی بھی ممکنہ ڈینگی وائرس سے متاثرہ فرد کو فوراً محکمہ صحت حکومت پنجاب کے ہسپتال میں رابطہ کرکے فوری اور بہترین علاج اور خدمات سیاستفادہ کرنا چاہیے۔