جہلم: زچہ بچہ کی موت میں غفلت ثابت ہونے پر ایک لیڈی ڈاکٹر نوکری سے فارغ ایک ڈاکٹر اور نرس کو معطل کرکے پیڈا ایکٹ کے تحت کارروائی شروع کر دی گئی، ڈاکٹرز اور نرس کے خلاف ہونے والی کارروائی کے خلاف ڈی ایچ کیو ہسپتال کے ڈاکٹرز اور نرسز نے او پی ڈی بند کر احتجاجی مظاہرہ شروع کر دیا، ڈاکٹروں کی ہڑتال کی وجہ سے ہسپتال میں آنے والے سینکڑوں مریض سارا دن ذلیل وخوار اور تڑپتے رہے۔
تفصیلات کے مطابق ایک ماہ قبل سوہاوہ کی رہائشی ماریہ نامی عورت کو سوہاوہ ٹی ایچ کیو ہسپتال سے ڈلیوری کیلیے ڈی ایچ کیو ہسپتال جہلم لایا گیا تھا لیکن ڈاکٹرز نے مریضہ کو دیکھے بغیر ہی راولپنڈی ہسپتال ریفر کر دیا تھا جہاں وہ تڑپ تڑپ کر پیٹ میں موجود بچے سمیت جان کی بازی ہار گئی تھی۔
واقعہ کی خبر سوشل میڈیا پر وائرل ہوئی تو ڈپٹی کمشنر جہلم کیپٹن ریٹائرڈ سمیع اللہ فاروق نے ازخود نوٹس لے کر لواحقین نے درخواست وصول کرکے تین مختلف انکوائری کمیٹیاں تشکیل دیں انکوائریوں کے دوران ڈاکٹر عمارہ فاروق۔ڈاکٹر زاہرہ بتول اور ہیڈ نرس سعدیہ صدف کی غفلت لاپروائی سے ماریہ کی موت ثابت ہوئی تو انکوائری رپورٹ پر ڈپٹی کمشنر نے محکمہ صحت کے صوبائی افسران کو کارروائی کی سفارش کی۔
سیکرٹری ہیلتھ نے ڈاکٹر زاہرہ بتول کو نوکری سے فارغ کرنے اور دیگر کو معطل کرکے کارروائی کرنے کے آرڈرز جاری کر دیئے ضلع جہلم میں پہلی بار محکمہ صحت عملے کے خلاف سخت محکمانہ کارروائی کے بعد دیگر ہیلتھ ملازمین میں ہلچل مچ گئی ہے۔
ڈپٹی کمشنر کیپٹن ریٹائرڈ سمیع اللہ فاروق کا کہنا ہے کہ کسی کو عوام کی جانوں سے کھیلنے کی اجازت نہیں دی جائے گی شہریوں نے ڈپٹی کمشنر کو زبردست خراج تحسین پیش کیا ہے۔
ڈاکٹرز اور نرس کے خلاف ہونے والی کارروائی کے خلاف ڈی ایچ کیو ہسپتال کے ڈاکٹرز اور نرسز نے احتجاجاً او پی ڈی بند کر دی اور ڈپٹی کمشنر کے خلاف نعرے بازی کرتے ہوئے مطالبہ کیا ہے کہ ڈاکٹرز اور نرس کے خلاف ہونے والی کارروائی واپس لی جائے ورنہ احتجاج کا دائرہ کار وسیع کر دیں گے۔
ڈاکٹروں کی ہڑتال کی وجہ سے ہسپتال میں آنے والے سینکڑوں مریض سارا دن ذلیل وخوار اور تڑپتے رہیے لیکن بیرحم ڈاکٹروں کو رحم نہ آیا اور سارا دن کمیٹی روم میں بیٹھنے کے بعد اپنے اپنے پرائیویٹ ہسپتالوں میں چلے گئے۔
ڈی ایچ کیو ہسپتال کی ڈاکٹرز اور نرس کے خلاف پہلی بار سخت محکمانہ کارروائی کرنے پر شہریوں نے سوشل میڈیا پر ڈپٹی کمشنر کیپٹن ریٹائرڈ سمیع اللہ فاروق کو زبردست خراج تحسین پیش کیا ہے۔