جہلم: تحریک انصاف کے رہنما فواد چوہدری کے بھائی نے اپنے حلقے کے معززین سے مبینہ بدتمیزی کی جس پر پارٹی کا مضبوط دھڑا ناراض ہوگیا ہے۔
نجی ٹی وی چینل آج نیوز کے مطابق تحریک انصاف کے رہنما فواد چوہدری کے بھائی فراز چوہدری نے جہلم کے علاقہ بائی دیس کے معززین سے مبینہ بدتمیزی کی جس پر جماعت کا مضبوط دھڑا ناراض ہوگیا ہے۔
علاقے کے مقامی رہنما ملک شوکت کا کہنا ہے کہ میرے ساتھ فواد کے بھائی فراز چوہدری نے بدتمیزی کی، علاقے میں آیا تو عملی طور پر جوتے ماروں گا۔
واقعے پر پی ٹی آئی تحصیل جہلم کے جنرل سیکرٹری ملک مشتاق نے بھی اپنے عہدے سے استعفی دے دیا ہے، اور بتایا کہ واقعے سے متعلق فواد چوہدری کو بتایا لیکن انہوں نے بھی ٹیلی فون پر کہا کہ پہلے دیس کا کچھ کرلیں پھر بائی دیس کا کر لیں گے۔
واضح رہے کہ اس سے قبل بھی جہلم میں تحریک انصاف کے سابق ایم پی اے راجہ یاور کمال نے پی ٹی آئی چھوڑنے کی دھمکی دیتے ہوئے الزام عائد کیا تھا کہ فواد چوہدری نے چیئرمین عمران خان کو بلیک میل کیا، جس وجہ سے عمران خان نے مجھے ٹکٹ نہیں دیا ہے۔
راجہ یاور کمال کا کہنا تھا کہ عمران خان نے فواد چوہدری کے بھائی کو ٹکٹ دیا اور چیئرمین پی ٹی آئی نے موروثی سیاست کو پروان چڑھایا ہے۔