عیدالفطر کے تین دنوں میں ریسکیو 1122 جہلم نے 154 افراد کو ریسکیو کیا۔ انجینئر سعید احمد

جہلم: عیدالفطر کے پرمسرت موقع پر جہاں پر لوگ اپنے پیاروں کے ساتھ عید کی خوشیاں منانے میں مصروف تھے وہیں پر عوامی خدمت کے جذبہ سے سرشار ریسکیورز عوام کی خدمت کے لیے موجود رہے، ریسکیو اہلکار دن ہو یا رات 24 گھنٹے عوام کی خدمت کے لیے لئے اپنی خدمات پیش کرتے رہے۔

انجینئر سعید احمد ڈسٹرکٹ ایمرجنسی آفیسر ریسکیو 1122جہلم نے کہا کہ عید کے تین دنوں میں 156 ایمرجنسیز پر رسپانس کر کے 154 لوگوں کو ریسکیو کیا۔ان ایمرجنسیز میں 154 مریضوں میں سے 32 افراد کو موقع پر ہی فرسٹ ایڈ فراہم کی گئی جبکہ 116 افراد کو ہسپتال منتقل کیا گیا۔

انہوں نے بتایا کہ ان 156 ایمرجنسیز میں سے روڈ ٹریفک حادثات کی تعداد 55 رہی اور ان حادثات میں زخمی ہونے والوں کی تعداد 60 ہے۔ جب کہ 03 افراد مختلف حادثات میں اپنی جان کی بازی ہار گئے۔ میڈیکل ایمرجنسیز کی تعداد 83، اونچائی سے گرنے کے 4 اور آگ لگنے کے 2 واقعات رونما ہوئے جبکہ متفرق ایمرجنسیز کی تعداد 12 رہی۔

ڈسٹرکٹ ایمرجنسی آفیسر انجینئر سعید احمد کا کہنا تھا کہ عیدالفطر کے موقع پر ریسکیورز نے بہت اچھی کارکردگی دکھائی ہے جو کہ قابل تعریف ہے۔ ریسکیو 1122 کا ارادہ عوام کا اپنا ارادہ ہے اور ہمارا مقصد عوام میں احساس تحفظ پیدا کرنا ہے۔