جہلم: محکمہ سول ڈیفنس کے ذمہ داران کی نااہلی اندرون شہر سمیت ضلع بھر کے علاقوں میں غیر قانونی منی پٹرول پمپس و ایل پی جی گیس ریفلنگ کا دھندہ عروج پر، معمولی سی چنگاری بھی کسی بڑے حادثے کا سبب بن سکتی ہے، سول ڈیفنس کے ذمہ داران کارروائیاں کرنے کی بجائے خاموش تماشائی بنے ہوئے ہیں۔
تفصیلات کے مطابق جہلم شہر سمیت ضلع بھر میں غیر قانونی منی پیٹرول پمپس کی بھرمار ہے، شہریوں کی جان و مال کو خطرات لاحق، جبکہ سول ڈیفنس کے ذمہ داران کارروائیاں کرنے کی بجائے کسی بڑے حادثے کا انتظار کرنے میں مصروف، غیر قانونی منی پٹرول پمپس شہر کے گنجان آباد علاقوں میں قائم ہو چکے ہیں۔
یہ غیر قانونی دھندہ دکان میں چھوٹی سی مشین لگا کر کھلے عام کیا جا رہا ہے، ان غیر قانونی دھندہ کرنے والوں کے اڈوں پر آگ بجھانے والے آلات اور نہ ہی کسی قسم کے حفاظتی اقدامات موجود ہیں چھوٹی سی چنگاری یا شارٹ سرکٹ سے پیدا ہونے والے شعلے کے نتیجے میں آگ بھڑکنے اور اس آگ کی لپیٹ میں قریبی دکانات و مکانات بھی آ سکتے ہیں جس سے قیمتی جانوں کے نقصانات جیسے واقعات بھی رونما ہو سکتے ہیں۔
متعدد منی پٹرول پمپ اور گیس ریفلنگ کے کارروبار سے منسلک افراد نے مکروہ دھندہ کرنے کے لئے ایسی جگہوں کا انتخاب کر رکھا ہے جہاں محلے داروں کے علاوہ کوئی تیسرا شخص اس بارے نہیں جانتا جبکہ دور دراز کے علاقوں میں پٹرول اور گیس ریفلنگ کرنے والے افراد نے دیدہ دلیری کے ساتھ مصروف ترین مقامات پر اڈے قائم کر کے گھناؤنا کارروبار شروع کر رکھا ہے جس کی وجہ سے کسی بھی وقت کوئی بڑا حادثہ رونما ہو سکتا ہے۔
شہریوں نے کمشنر راولپنڈی، ڈپٹی کمشنر سے منی پٹرول پمپوں اور گیس ریفلنگ کرنے والے افراد کے خلاف فوجداری مقدمات درج کرنے اور سول ڈیفنس کے ذمہ داران کے خلاف موثر کارروائیاں کرنے کا مطالبہ کیا ہے۔