جہلم: اندرون شہر کی سڑکوں کے دونوں اطراف تجاوزات کی بھرمار، ٹریفک جام رہنا روزانہ کا معمول بن گیا، شہریوں کا پیدل چلنا بھی محال ہو کر رہ گیا۔
تفصیلات کے مطابق شہر کی اندرونی سڑکوں سمیت جی ٹی روڈ سے ملحقہ قائم سروس روڈ کے دونوں اطراف ریڑھی بانوں اور لوڈر رکشے والوں نے مستقل بنیادوں پر قبضے جما رکھے ہیں جہاں ریڑھی بان اور چنگ چی و لوڈررکشے کھڑے کر سبزی و فروٹ کی فروخت کرتے دکھائی دیتے ہیں جس سے ٹریفک کی روانی مفلوج ہو کر رہ جاتی ہے۔
شہریوں کا پیدل چلنا بھی محال ہو کر رہ گیا ہے سب سے زیادہ گھمبیر صورتحال صبح دوپہر اور شام کے وقت ہوتی ہے شہری حلقوں کا اس حوالے سے کہنا ہے کہ سرکاری و نجی اداروں کے ملازمین طلباء و طالبات بر وقت اپنے محکموں و تعلیمی اداروں میں نہیں پہنچ پاتے جبکہ تجاوزات کی وجہ سے سیکورٹی رسک میں بھی اضافہ ہو چکا ہے ۔
شہری حلقوں نے متعلقہ حکام سے مطالبہ کیا کہ تجاوزات کو جلد از جلد ہٹایا جائے تا کہ سڑکیں کشادہ ہوں اور شہریوں کو آمدورفت میں پیش آنے والی مشکلات کا خاتمہ ممکن ہو سکے۔