اکرم شہید روڈ اور کچہری روڈ پر قائم ہسپتالوں اور میرج ہالز انتظامیہ نے سڑکوں کو پارکنگ میں تبدیل کر دیا

جہلم: میجر اکرم شہید روڈ، کچہری روڈ پر قائم نجی ہسپتالوں، میرج ہالز کی انتظامیہ نے سرکاری سڑکوں کو پارکنگ میں تبدیل کر دیا، میونسپل کمیٹی کے شعبہ انکروچمنٹ و ٹریفک پولیس کی خاموشی سوالیہ نشان بن گئی۔شہریوں کا سڑکوں پر قائم پارکنگ کے خاتمے کا مطالبہ۔

تفصیلات کے مطابق میجر اکرم شہید روڈ، کچہری روڈ، اولڈ جی ٹی روڈ پر قائم نجی ہسپتالوں، تعلیمی اداروں، شادی ہالز کی زاتی پارکنگ نہ ہونے کیوجہ سے صبح و شام آنیوالے مریضوں اور سائلین کی گاڑیاں ، موٹر سائیکلیں کھڑی کرکے سڑکیں بند کر دیتے ہیں ، جس کی وجہ سے سڑکوں پر سے گزرنے والے شہریوں کو شدید مشکلات کا سامنا کرنا پڑتا ہے۔

نجی ہسپتالوں میں آنے والے مریض اور ان کے لواحقین سڑک کنارے گاڑیاں کھڑی کرکے غائب ہو جاتے ہیں ، جس کیوجہ سے مضافاتی علاقوں سے آنے والی چھوٹی ، بڑی گاڑیاں موٹر سائیکل سواروں کو شدید پریشانی کا سامنا کرنا پڑتا ہے، میونسپل کمیٹی کے شعبہ انکروچمنٹ اور ٹریفک پولیس کے عملے کی نااہلی کی وجہ سے شہریوں کو طویل دورانیے تک مسائل کاسامنا کرنا پڑتا ہے۔

شہریوں نے ڈپٹی کمشنر ، ڈسٹرکٹ پولیس آفیسر ،قائم مقام ڈی ایس پی ٹریفک پولیس ، ایڈمنسٹریٹر میونسپل کمیٹی سے مطالبہ کیاہے کہ اندرون شہر کی سڑکوں جن میں میجر اکرم شہید روڈ، کچہری روڈ، اولڈ جی ٹی روڈ، سول لائن روڈ پر قائم ہونے والے نجی ہسپتالوں ، تعلیمی اداروں ، میرج ہالز کے باہر کھڑی ہونے والی گاڑیوں ، موٹر سائیکلز مالکان کے خلاف قانونی کارروائی عمل میں لائی جائے تاکہ شہریوں کو آمدورفت میں پیش آنے والی پریشانیوں کا خاتمہ ممکن ہو سکے۔