جہلم: عارضہ دل، شوگر اور دمہ کے مرض میں مبتلا افراد سردی اور دھند میں احتیاط کریں، خصوصی ماسک اور گرم لباس کا استعمال کیا جائے، نزلہ زکام کے مریضوں سے ہاتھ ملانے اور گلے ملنے سے اجتناب کریں۔
ان خیالات کا اظہار ڈسٹرکٹ ہیڈ کوارٹر ہسپتال جہلم کے سپیشلسٹ ڈاکٹروں نے اخبار نویسوں سے خصوصی گفتگو کرتے ہوئے کیا۔ میڈیکل سپیشلسٹ ڈاکٹر فواد مجید چوہدری کا کہنا تھا کہ نزلہ زکام، انفلوائنز کا بگاڑ ایک وائرل بیماری ہے جس سے احتیاط ضروری ہے، اگر موجودہ سردی میں چھینکیں آئیں، تیز بخار ہو، جسم درد کرے ، تھکاوٹ اور ڈائریا ہو تو سمجھیں کہ آپ انفلوائنزا یا سوائن فلو کا شکار ہو چکے ہیں اور فوری طور پر اپنے معالج سے یا ہسپتال سے رجوع کریں۔
سابق ڈسٹرکٹ سرجن ڈاکٹر شاہد سہیل نے کہا کہ شوگر کے مریضوں کے لیے شدیدسردی زیادہ خطرناک ثابت ہوسکتی ہے، عام ماسک کے بجائے نزلہ وزکام والے این 95 والا ماسک استعمال کریں۔ ماہر امراض قلب نے کہا کہ دل کے مریضوں کو سیر کے لیے باہر نہیں نکلنا چاہئے اور دھوپ میں واک کریں،دل کے مریض بہتر درجہ حرارت میں جم میں ورزش کرسکتے ہیں۔
ماہر امراض سانس و دمہ ڈاکٹر حفیظ الرحمن ملک نے کہا کہ سانس و دمہ کے مریض دھند سے بچیں، دھوپ نکلنے پر باہر نکلیں اور سائیکل و موٹر سائیکل کے استعمال کو ان دنوں میں ترک کردیں۔