جہلم: سکولز و کالجز کی ویگنوں کے ڈرائیورز پک اینڈ ڈراپ کے دوران دھڑلے سے سگریٹ نوشی کرنے میں مصروف ، گاڑیوں میں سوار مستقبل کے معماروں کی زندگیاں خطرے سے دوچار ،سکولز وکالجز میں طلباء طالبات کو لے کر جانے والی گاڑیوں کے ڈرائیور دھڑلے سے سگریٹ نوشی کرتے دکھائی دیتے ہیں ،صحت کے ساتھ ساتھ گیس وپٹرول پر چلنے والی گاڑیاں طلباء وطالبات کے لئے خطرہ بن گئیں۔
تفصیلات کے مطابق روزانہ کی بنیاد پر چھوٹے چھوٹے معصوم بچوں سمیت سکولز وکالجز میں طلباء وطالبات کو لے کر جانے و لانے والی گاڑیوں کے ڈرائیور ز بلاخوف و خطر سگریٹ نوشی کرتے دیکھائی دیتے ہیں جس کے دھوئیں سے گاڑیوں میں سوار معصوم بچوں، طلباء وطالبات کو سانس، دمے، پھیپھڑوں و دیگر موذی امراض لاحق ہورہے ہیں۔
دوسری جانب گیس اور پٹرول سے چلنے والی گاڑیاں سگریٹ نوشی کی وجہ سے بارود کی منظر کشی کرتی دکھائی دیتی ہیں جس کی وجہ سے معصوم جانوں کے سروں پر خوف کے سائے منڈلاتے رہتے ہیں۔
اس حوالے سے بچوں کے والدین کا کہنا ہے کہ متعدد بار گاڑیوں کے ڈرائیورز کو سگریٹ نوشی کرنے سے منع کیا ہے مگر اسکے باوجود ڈرائیورز اپنی روش تبدیل کرنے سے گریزاں ہیں بلکہ بچوں کے لئے گاڑیاں تبدیل کرنے کی دھونس دے کر خاموش کروادیتے ہیں جس کی وجہ سے والدین شدید ذہنی کرب میں مبتلا ہیں۔
والدین سمیت شہری تنظیموں کے عمائدین نے ڈسٹرکٹ پولیس آفیسر، سیکرٹری ڈسٹرکٹ ریجنل ٹرانسپورٹ اتھارٹی، موٹروہیکل ایگزامینر، قائم مقام ڈی ایس پی ٹریفک سمیت قانون نافذ کرنے والے اداروں کے ذمہ داران سے سکولز و کالجز کی ڈیوٹیاں کرنیوالے ڈرائیورز جو سگریٹ نوشی کے مرتکب ہیں کے خلاف کارروائیاں کرنے کا مطالبہ کیا ہے۔