جہلم: میونسپل کمیٹی، ٹریفک پولیس اور محکمہ ماحولیات کی سرپرستی میں جگہ جگہ چنگ چی رکشہ اسٹینڈ قائم، شاندار چوک کے چاروں اطراف بااثر ڈرائیوروں نے سڑکوں پر رکشے کھڑے کر لئے، شہریوں کو آمدورفت میں مشکلات کا سامنا ہے۔
میونسپل کمیٹی اور ٹریفک پولیس نے شہریوں کے مسائل سے لا تعلقی اختیار کر لی، بیشتر چنگ چی رکشوں کے شور، دھویں سے شہریوں کی زندگیاں اجیرن بن گئیں، کم عمر چنگ چی رکشہ ڈرائیور بغیر روٹ پرمٹ اور بغیر لائسنس کے خطرناک طریقے سے چنگ چی رکشے ڈرائیونگ کرتے ہوئے سڑکوں پر نظر آتے ہیں اور حادثات کے باعث انسانی زندگیوں کا ضیاع بھی روزانہ کا معمول بن چکا ہے۔
شہر کے اندرونی علاقوں شاندار چوک، کچہری چوک، مسجد گنبد والی، ریلوے روڈ، میجر اکرم شہید روڈ، اقبال لائبریری روڈ، جی ٹی ایس چوک، مشین محلہ نمبر 3 چوک، جادہ چوک سمیت دیگر درجنوں مقامات پر ہمہ وقت سینکڑوں چنگ چی رکشے کھڑے ہونے سے ٹریفک جام ہو جاتی ہے، بازاروں میں خریداری کے لیے آنے والی خواتین کو بھی خریداری کرتے وقت پریشانی کا سامنا کرنا پڑتا ہے۔
رکشوں کے غیر قانونی اڈوں اور شور شرابے و دھوئیں سے شہری بہرے پن، دمے، ٹی بی کے مرض اور آنکھوں کی بیماریوں کا شکار ہو رہے ہیں۔ اس حوالے سے ان مخصوص جگہوں پر ڈیوٹیاں کرنے والے ٹریفک پولیس کے اہلکار بھی ڈیوٹیوں سے غیر حاضر رہتے ہیں۔ ڈسٹرکٹ روڈ ٹرانسپورٹ اتھارٹی کا عملہ بھی چنگ چی رکشہ ڈرائیوروں کے خلاف کارروائیاں کرنے سے گریزاں ہے۔
قابل ذکر بات یہ ہے کہ بیشتر رکشہ ڈرائیوروں کے پاس نہ تو لائسنس ہے اور نہ ہی شناختی کارڈ اس کے باوجود سواریوں کو بٹھا کر سڑکوں پر دوڑتے نظر آتے ہیں۔
شہریوں نے انسپکٹر جنرل پنجاب پولیس، آر پی او راولپنڈی، ڈی پی او جہلم سے مطالبہ کیا ہے کہ شہر سمیت ضلع بھر میں قائم ہونے والے غیر قانونی چنگ چی رکشہ اسٹینڈ کا خاتمہ کیا جائے اور لائسنس کے بغیر چنگ چی رکشے چلانے والے افراد کے کیخلاف کریک ڈاؤن کیا جائے، تا کہ شہریوں کی مشکلات میں کمی واقع ہو سکے۔