دینہ: جہلم پولیس کی موثر تفتیش پر معزز عدالت کا بڑا فیصلہ، دینہ میں 6 سالہ بچی سے زیادتی کرنے والے مجرم کو عمر قید، 2 لاکھ جرمانے اور ہرجانے کی سزا سنا دی گئی۔
ایڈیشنل سیشن جج شہباز حسین نے جنسی زیادتی کے مقدمہ نمبر 69 بجرم 376iii ت پ تھانہ دینہ کا فیصلہ سنا دیا، مجرم فرقان اقبال عرف شاہ زیب ولد محمد اقبال سکنہ تین پورہ زیریں دینہ نے جنسی زیادتی کے جرم کا ارتکاب کیا تھا جس پر معزز عدالت نے مجرم فرقان اقبال کو عمر قید اور 1لاکھ روپے جرمانہ اور 1لاکھ روپے ہرجانہ کی سزا سنا دی۔
رواں سال فروری میں دینہ کے نواحی علاقہ تین پورہ زیریں میں مجرم فرقان عرف شاہ زیب نے 6 سالہ بچی کو اپنے گھر میں مبینہ زیادتی کا نشانہ بنایا تھا۔ 6 سالہ بچی مجرم کی دادی کے پاس قرآن پاک پڑھنے گئی جہاں موقع پا کر مجرم فرقان نے بچی سے زیادتی کی تھی۔
دینہ پولیس نے مجرم کو ٹریس کرکے گرفتار کیا اور ٹھوس شواہد کیساتھ چالان عدالت کیا اور مقدمہ کی موثر پیروی کی جس کے پیش نظر معزز عدالت نے مجرم کو قرار واقعی سزا سنائی۔
ڈی پی او جہلم ناصر محمود باجوہ نے کہا کہ سنگین مقدمہ میں ملوث ملزمان کو سزائیں ملنا قانون اور انصاف کی فتح ہے۔ ڈی پی او جہلم ناصر محمود باجوہ نے انوسٹی گیشن اور لیگل ٹیموں کو شاباش، تعریفی سرٹیفکیٹ اور نقد انعام دینے کا اعلان کیا۔